រាជធានីភ្នំពេញ៖ ឯកឧត្តម កើត រិទ្ធ ឧបនាយករដ្ឋមន្រ្តី រដ្ឋមន្រ្តីក្រសួងយុត្តិធម៌ ព្រមទាំងថ្នាក់ដឹកនាំ និងមន្រ្តីរាជការក្រោមឱវាទទាំងអស់នៃក្រសួងយុត្តិធម៌ បានប្រកាសគាំទ្រយ៉ាងពេញទំហឹងនូវជំហររបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ទៅលើការអនុវត្តសាងសង់លើគម្រោងព្រែកជីក ហ្វូណនតេជោ ជាប្រវត្តិសាស្រ្តរបស់កម្ពុជា។ 

គួរបញ្ជាក់ថា គម្រោងព្រែកជីក ហ្វូណនតេជោ គឺជាគម្រោងព្រែកជីកដ៏ធំរបស់កម្ពុជាចាក់ទម្លុះទៅកាន់សមុទ្ររបស់កម្ពុជាដោយផ្ទាល់ និងឈប់រំពឹងលើសមុទ្ររបស់វៀតណាម ដែលនឹងផ្ដល់អត្ថប្រយោជន៍ជាច្រើនដល់ប្រទេសកម្ពុជា ជាពិសេសវិស័យដឹកជញ្ជូន អចលនទ្រព្យ និងការវិនិយោគផ្សេងៗ ខណៈដែលគម្រោងមួយនេះ គ្រោងនឹងចំណាយទឹក ប្រាក់រហូតដល់ប្រមាណ ១,៧ ពាន់លានដុល្លារអាមេរិក ដោយត្រូវប្រើពេលវេលា៤ឆ្នាំ ដើម្បីសាងសង់បញ្ចប់គម្រោង។

ថ្លែងនៅក្នុងពិធីបិទសន្និបាតសមាគមន៍ឧកញ៉ាកម្ពុជាកាលពីថ្ងៃទី២៦ ខែមេសា ឆ្នាំ២០២៤ សម្ដេចតេជោ ហ៊ុន សែន បានជំរុញឲ្យប្រជាពលរដ្ឋកម្ពុជាគ្រប់រូបគាំទ្រចំពោះគម្រោងដ៏មានអត្ថប្រយោជន៍នេះ ដោយថាវានឹងផ្ដល់ផលប្រយោជន៍ដ៏ច្រើនជូនជាតិប្រជាជន ហើយកម្ពុជានឹងនៅតែធ្វើទោះបីជាមានការតវ៉ាពីប្រទេសវៀតណាមក្ដី៕